ನನ್ನ ತಲೆಕೂದಲಿನ ವಿನ್ಯಾಸದ ಬಗ್ಗೆ ಮಾತನಾಡೋಕೆ ಬೇರೆ ಕೆಲಸ ಇಲ್ಲವಾ? ಅಷ್ಟೋಂದು ಆಸಕ್ತಿ ಇದ್ದರೆ ಟೈಂ ಕೊಡ್ತೀನಿ ಬಂದು ಕಟಿಂಗ್ ಮಾಡಿ ಎಂದು ಶಿಕ್ಷಣ ಸಚಿವ ಮಧು ಬಂಗಾರಪ್ಪ ಬಿಜೆಪಿ ರಾಜ್ಯಾಧ್ಯಕ್ಷ ವಿಜಯೇಂದ್ರ ಅವರಿಗೆ ತಿರುಗೇಟು ನೀಡಿದ್ದಾರೆ.
ಮೈಸೂರಿನಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮಧು ಬಂಗಾರಪ್ಪ ಅವರಿಗೆ ವಿಜಯೇಂದ್ರ ನಿಮಗೆ ಕಟಿಂಗ್ ಮಾಡಿಕೊಳ್ಳೋಕೆ ಹಣ ಇಲ್ಲ ಅಂತ ಕಾಣುತ್ತೆ. ನಾವೇ ಹಣ ಸಂಗ್ರಹಿಸಿ ಪ್ರತಿ ತಿಂಗಳು ಕಟಿಂಗ್ ಮಾಡಿಸಿಕೊಳ್ಳೋಕೆ ಕೊಡ್ತೀವಿ ಎಂಬ ಹೇಳಿಕೆಗೆ ಈ ರೀತಿ ಪ್ರತಿಕ್ರಿಯಿಸಿದರು.
ಬಿಜೆಪಿಯವರಿಗೆ ಮಾಡಲು ಏನು ಕೆಲಸ ಇಲ್ಲವಾ? ಕೇವಲ ವೈಯಕ್ತಿಕ ಟೀಕೆ ಮಾಡೋದೇ ಆಗೋಯ್ತು. ಡಿಕೆ ಶಿವಕುಮಾರ್ ಗಡ್ಡದ ಬಗ್ಗೆ ಮಾತನಾಡಿದ್ದಕ್ಕೆ 110ರಿಂದ 63ಕ್ಕೆ ಬಂದಿದ್ದೀರಿ. ಈಗ ನನ್ನ ಕಟಿಂಗ್ ಬಗ್ಗೆ ಮಾತನಾಡಿ 26ರಿಂದ 6ಕ್ಕೆ ಬರ್ತಾರೆ ನೋಡಿ ಎಂದು ಅವರು ಹೇಳಿದರು.
ಬಿಜೆಪಿಯವರು ದೇಶದ ಸಮಸ್ಯೆಗಳ ಬಗ್ಗೆ ಮಾತನಾಡಬೇಕು. ಆದರೆ ಬೇಡದೇ ಇರುವ ವಿಚಾರಗಳ ಬಗ್ಗೆನೇ ಮಾತನಾಡುತ್ತಾರೆ. ಈ ಹಿಂದೆ ರಾಷ್ಟ್ರಪತಿ ಅಬ್ದುಲ್ ಕಲಾಂ ಅವರ ಕೇಶವಿನ್ಯಾಸದ ಬಗ್ಗೆಯೂ ಮಾತನಾಡಿದ್ದರು. ಕೊರೊನಾ ಟೈಮಲ್ಲಿ ಪ್ರಧಾನಿ ಮೋದಿ ಗಡ್ಡ ಬಿಟ್ಟಿದ್ದು ಯಾಕೆ ಅಂತ ಇವರ್ಯಾರು ಯಾಕೆ ಕೇಳಲಿಲ್ಲ. ನಾವು ಕೇಳಿದ್ದಿವಾ? ಬಾಯಿಗೆ ಬಂದಂತೆ ಮಾತನಾಡೋದು ನಿಲ್ಲಿಸಬೇಕು ಎಂದು ಮಧು ಬಂಗಾರಪ್ಪ ಹೇಳಿದರು.
