ಸಿಡಿಲಬ್ಬರದ ಬ್ಯಾಟಿಂಗ್ ನಿಂದ ಗಮನ ಸೆಳೆಯುತ್ತಿರುವ ವೈಭವ್ ಸೂರ್ಯವಂಶಿ 84 ಎಸೆತಗಳಲ್ಲಿ ಸಿಡಿಸಿದ 190 ರನ್ ನೆರವಿನಿಂದ ವಿಜಯ್ ಹಜಾರೆ ಕ್ರಿಕೆಟ್ ಟೂರ್ನಿಯಲ್ಲಿ ಬಿಹಾರ 574 ರನ್ ಪೇರಿಸಿ ವಿಶ್ವದಾಖಲೆ ಬರೆದಿದೆ.
ರಾಂಚಿಯಲ್ಲಿ ಬುಧವಾರ ನಡೆದ ಅರುಣಾಚಲ ಪ್ರದೇಶ ವಿರುದ್ಧದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಲು ನಿರ್ಧರಿಸಿದ ಬಿಹಾರ ತಂಡ ಮೂವರು ಬ್ಯಾಟ್ಸ್ ಮನ್ ಗಳ ಶತಕದ ನೆರವಿನಿಂದ 50 ಓವರ್ ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 547 ರನ್ ಪೇರಿಸಿತು.
ಏಕದಿನ ಇತಿಹಾಸದಲ್ಲೇ ಯಾವುದೇ ದೇಶೀಯ ಕ್ರಿಕೆಟ್ ನಲ್ಲಿ ತಂಡವೊಂದು ದಾಖಲಿಸಿದ ಗರಿಷ್ಠ ಮೊತ್ತ ಇದಾಗಿದೆ. 2022ರಲ್ಲಿ ಇದೇ ಅರುಣಾಚಲ ಪ್ರದೇಶ ವಿರುದ್ಧ ತಮಿಳುನಾಡು 2 ವಿಕೆಟ್ ಗೆ 506 ರನ್ ಗಳಿಸಿದ್ದು ಇದುವರೆಗಿನ ಗರಿಷ್ಠ ರನ್ ವಿಶ್ವದಾಖಲೆಯಾಗಿತ್ತು.
ಭರ್ಜರಿ ಫಾರ್ಮ್ ನಲ್ಲಿರುವ ವೈಭವ್ ಸೂರ್ಯವಂಶಿ 84 ಎಸೆತಗಳಲ್ಲಿ 16 ಬೌಂಡರಿ ಮತ್ತು 15 ಸಿಕ್ಸರ್ ನೆರವಿನಿಂದ 190 ರನ್ ಬಾರಿಸಿದ್ದಾಗ ಔಟಾಗಿ ದ್ವಿಶತಕ ತಪ್ಪಿಸಿಕೊಂಡರು. ವೈಭವ್ ಆರ್ಭಟ ಎಷ್ಟು ಜೋರಾಗಿತ್ತೆಂದರೆ ಮೊದಲ ವಿಕೆಟ್ ಗೆ 14.3 ಓವರ್ ಗಳಲ್ಲಿ 158 ರನ್ ಜೊತೆಯಾಟ ನಿಭಾಯಿಸಿದರು. ಇದರಲ್ಲಿ ಮತ್ತೊಂದು ತುದಿಯಲ್ಲಿದ್ದ ಮಂಗಲ್ ಮಹ್ರರೋರ್ ಕಾಣಿಕೆ ಕೇವಲ 33 ಆಗಿತ್ತು.
ವೈಭವ್ ಸೂರ್ಯವಂಶಿ 36 ಎಸೆತಗಳಲ್ಲಿ ಶತಕ ಸಿಡಿಸಿ ಅತ್ಯಂತ ವೇಗವಾಗಿ ಶತಕ ಸಿಡಿಸಿದ ಅತ್ಯಂತ ಕಿರಿಯ ಆಟಗಾರ (14 ವರ್ಷ 292 ದಿನ) ಎಂಬ ದಾಖಲೆ ಬರೆದಿದ್ದಾರೆ. 10 ಬೌಂಡರಿ ಮತ್ತು 6 ಸಿಕ್ಸರ್ ನೆರವಿನಿಂದ ಶತಕ ಪೂರೈಸಿದರು. ಈ ಮೂಲಕ ದೇಶೀಯ ಕ್ರಿಕೆಟ್ ನಲ್ಲಿ ಅತ್ಯಂತ ವೇಗವಾಗಿ ಶತಕ ಪೂರೈಸಿದ ಎರಡನೇ ಆಟಗಾರ ಎನಿಸಿಕೊಂಡರು. ಜಾಕ್ ಫ್ರೇಜರ್ 2023ರಲ್ಲಿ 29 ಎಸೆತಗಳಲ್ಲಿ ಶತಕ ಪೂರೈಸಿದ್ದು ಇದುವರೆಗಿನ ದಾಖಲೆಯಾಗಿದೆ.
ನಂತರ ಪಿಯೂಶ್ ಸಿಂಗ್ (77), ಆಯುಷ್ ಲೋಹಾರುಕಾ 56 ಎಸೆತಗಳಲ್ಲಿ 11 ಬೌಂಡರಿ ಮತ್ತು 8 ಸಿಕ್ಸರ್ ಒಳಗೊಂಡ 116 ರನ್ ಪೇರಿಸಿದರೆ, ನಾಯಕ ಸಕಿಬುಲ್ ಗನಿ 40 ಎಸೆತಗಳಲ್ಲಿ 10 ಬೌಂಡರಿ ಮತ್ತು 12 ಸಿಕ್ಸರ್ ಸಹಾಯದಿಂದ 128 ರನ್ ಸಿಡಿಸಿದರು. ಅರುಣಾಚಲ ಪ್ರದೇಶ ಪರ ಮೋಹಿತ್ ಮತ್ತು ಟೆಚಿ ನೆರಿ ತಲಾ 2 ವಿಕೆಟ್ ಗಳಿಸಿದರು.
