ಕ್ರಾಂತಿ ಗೌಡ್ ಮತ್ತು ದೀಪ್ತಿ ಶರ್ಮ ಅವರ ಮಾರಕ ದಾಳಿ ನೆರವಿನಿಂದ ಭಾರತ ತಂಡ 88 ರನ್ ಗಳ ಭಾರೀ ಅಂತರದಿಂದ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ತಂಡವನ್ನು ಸೋಲಿಸಿ ಮಹಿಳಾ ವಿಶ್ವಕಪ್ ಏಕದಿನ ಟೂರ್ನಿಯಲ್ಲಿ ಅಗ್ರಸ್ಥಾನಕ್ಕೇರಿದೆ.
ಕೊಲಂಬೊದಲ್ಲಿ ಭಾನುವಾರ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಭಾರತ ತಂಡ 50 ಓವರ್ ಗಳಲ್ಲಿ 247 ರನ್ ಗೆ ಆಲೌಟಾಯಿತು. ಸ್ಪರ್ಧಾತ್ಮಕ ಮೊತ್ತ ಬೆಂಬತ್ತಿದ ಪಾಕಿಸ್ತಾನ 43 ಓವರ್ ಗಳಲ್ಲಿ 159 ರನ್ ಗೆ ಆಲೌಟಾಯಿತು. ಈ ಮೂಲಕ ಭಾರತ ಪಾಕಿಸ್ತಾನ ವಿರುದ್ಧದ ಮುಖಾಮಖಿಯಲ್ಲಿ ಸತತ 12ನೇ ಗೆಲುವಿನ ದಾಖಲೆ ಬರೆಯಿತು.
ಭಾರತದ ಪರ ಮಾರಕ ದಾಳಿ ನಡೆಸಿದ ಕ್ರಾಂತಿ ಗೌಡ ಮತ್ತು ದೀಪ್ತಿ ಶರ್ಮ ಪಾಕಿಸ್ತಾನದ ಆಟಗಾರ್ತಿಯರು ನೆಲಕಚ್ಚಿ ಆಡಲು ಬಿಡಲಿಲ್ಲ. ಪಾಕಿಸ್ತಾನದ ಪರ ಸಿದ್ರಾ ಅಮಿನ್ 106 ಎಸೆತಗಳಲ್ಲಿ 9 ಬೌಂಡರಿ ಮತ್ತು 1 ಸಿಕ್ಸರ್ ನೆರವಿನಿಂದ ಭರ್ಜರಿ ಪ್ರದರ್ಶನ ನೀಡಿ ಏಕಾಂಗಿ ಹೋರಾಟ ನಡೆಸಿದರೂ ಮತ್ತೊಂದು ಕಡೆಯಿಂದ ಯಾವುದೇ ಬೆಂಬಲ ದೊರೆಯದ ಕಾರಣ ತಂಡ ಹೀನಾಯ ಸೋಲುಂಡಿತು.
ಪಾಕಿಸ್ತಾನ ತಂಡ 26 ರನ್ ಗೆ 3 ವಿಕೆಟ್ ಕಳೆದುಕೊಂಡು ಆರಂಭಿಕ ಆಘಾತಕ್ಕೆ ಒಳಗಾಗಿತ್ತು. ಆದರೆ ಸಿದ್ರಾ ಅಮಿನ್ ಮತ್ತು ನಥಾಲಿಯಾ ಪೆರಿವೆಜ್ 4ನೇ ವಿಕೆಟ್ ಗೆ 69 ರನ್ ಜೊತೆಯಾಟ ನಿಭಾಯಿಸಿ ತಂಡದಲ್ಲಿ ಗೆಲುವಿನ ಭರವಸೆ ಮೂಡಿಸಿದರು. ಆದರೆ ಇವರಿಬ್ಬರ ಜೊತೆಯಾಟ ಮುರಿಯುತ್ತಿದ್ದಂತೆ ತಂಡ ನಾಟಕೀಯ ಕುಸಿತ ಕಂಡಿತು.
ಇದಕ್ಕೂ ಮೊದಲು ಬ್ಯಾಟ್ ಮಾಡಿದ ಭಾರತ ತಂಡದ ಪರ ಯಾವೊಬ್ಬ ಆಟಗಾರ್ತಿಯೂ ದೊಡ್ಡ ಮೊತ್ತ ಗಳಿಸಿದೇ ಇದ್ದರೂ ತಕ್ಕಮಟ್ಟಿನ ಪ್ರದರ್ಶನ ನೀಡಿ ತಂಡವನ್ನು ಆಧರಿಸಿದರು. ಪ್ರತೀಕಾ ರಾವಲ್ (೩೩), ಸ್ಮೃತಿ ಮಂದಾನ (23), ಹರ್ಲಿನ್ ಡಿಯೊಲ್ (46), ಜೆಮಿಹಾ ರೋಡ್ರಿಗಜ್ (32), ದೀಪ್ತಿ ಶರ್ಮ (25), ಸ್ನೇಹಾ ರಾಣ (20) ತಕ್ಕಮಟ್ಟಿಗೆ ಪ್ರದರ್ಶನ ನೀಡಿದರು.
ಡಯಾನಾ ಬೇಗ್ ಮಾರಕ ದಾಳಿ ನಡೆಸಿ 4 ವಿಕೆಟ್ ಪಡೆದರು. ಈ ಹಂತದಲ್ಲಿ ಭಾರತ 200ರ ಗಡಿ ದಾಟುವುದು ದುಸ್ತರವಾಗಿತ್ತು. ಈ ಹಂತದಲ್ಲಿ ರಿಚಾ ಘೋಷ್ 20 ಎಸೆತಗಳಲ್ಲಿ 3 ಬೌಂಡರಿ ಮತ್ತು 2 ಸಿಕ್ಸರ್ ಒಳಗೊಂಡ 35 ರನ್ ಬಾರಿಸಿ ಅಜೇಯರಾಗಿ ಉಳಿದು ತಂಡವನ್ನು250ರ ಗಡಿ ಸಮೀಪ ಕೊಂಡೊಯ್ದರು.
