ಪಂದ್ಯದ ಕೊನೆಯ ಕ್ಷಣದಲ್ಲಿ ಮಾರ್ಸೆಲ್ ಸಬಿಟ್ಜರ್ ಸಿಡಿಸಿದ ಗೋಲಿನ ನೆರವಿನಿಂದ ಆಸ್ಟ್ರೀಯಾ ತಂಡ 3-2 ಗೋಲುಗಳಿಂದ ನೆದರ್ಲೆಂಡ್ಸ್ ವಿರುದ್ಧ ಗೆಲುವು ದಾಖಲಿಸಿ ಯುರೋ ಕಪ್ ಫುಟ್ಬಾಲ್ ಟೂರ್ನಿಯಲ್ಲಿ ಅಗ್ರಸ್ಥಾನಿಯಾಗಿ 16ರ ಘಟ್ಟಕ್ಕೆ ಲಗ್ಗೆ ಹಾಕಿದೆ.
ಮಂಗಳವಾರ ನಡೆದ ಡಿ ಗುಂಪಿನ ಮತ್ತೊಂದು ಪಂದ್ಯದಲ್ಲಿ ಜಯ ಸಾಧಿಸಿದ ಆಸ್ಟ್ರೀಯಾ ಗುಂಪಿನಲ್ಲಿ ಅಗ್ರಸ್ಥಾನಿಯಾಗಿ ಪ್ರೀಕ್ವಾರ್ಟರ್ ಫೈನಲ್ ಪ್ರವೇಶಿಸಿತು.
ಆಸ್ಟ್ರೀಯಾ ಪರ ಡೊನಿಯೆಲ್ ಮಾಲೆನ್ (6ನೇ ನಿಮಿಷ, ಸ್ವಯಂ ಗೋಲು), ರೊಮಾನೊ ಸ್ಕಿಮಿಡ್ (59ನೇ ನಿಮಿಷ), ಮಾರ್ಸೆಲ್ ಸಬಿಟ್ಜರ್ (80ನೇ ನಿಮಿಷ) ತಲಾ ಒಂದು ಗೋಲು ಬಾರಿಸಿದರೆ, ನೆದರ್ಲೆಂಡ್ಸ್ ಪರ ಕೋಡಿ ಗಾಪ್ಕೊ (47ನೇ ನಿಮಿಷ) ಮತ್ತು ಮೆಪಿಸ್ ಡೀಪೆ (75ನೇ ನಿಮಿಷ) ತಲಾ ಒಂದು ಗೋಲು ಬಾರಿಸಿ ಹೋರಾಟ ನಡೆಸಿದರೂ ಪ್ರಯೋಜನವಾಗಲಿಲ್ಲ.
ಆಸ್ಟ್ರೀಯಾ ಆಡಿದ 3 ಪಂದ್ಯಗಳಿಂದ 2 ಗೆಲುವು, 1 ಸೋಲಿನೊಂದಿಗೆ 6 ಅಂಕದೊಂದಿಗೆ ಅಗ್ರಸ್ಥಾನ ಪಡೆದರೆ, 1 ಅಂಕದಿಂದ ಹಿಂದೆ ಬಿದ್ದ ಫ್ರಾನ್ಸ್ 2ನೇ ಸ್ಥಾನ ಗಳಿಸಿತು.
