ನವದೆಹಲಿ: ‘ಆಪರೇಷನ್ ಸಿಂಧೂರ್’ ಕಾರ್ಯಾಚರಣೆಯ ಯಶಸ್ಸಿನಲ್ಲಿ ಮಹತ್ವದ ಪಾತ್ರ ವಹಿಸಿದ ಎಸ್-400 ವಾಯು ರಕ್ಷಣಾ ವ್ಯವಸ್ಥೆಯನ್ನು ಮತ್ತಷ್ಟು ಹೆಚ್ಚು ಖರೀದಿಸಲು ಭಾರತ ಮುಂದಾಗಿದೆ. ಇದೇ ವೇಳೆ ಅಭಿವೃದ್ಧಿಪಡಿಸಿದ ಎಸ್-500 ಖರೀದಿಗೂ ರಷ್ಯಾ ಮುಂದೆ ಭಾರತ ಪ್ರಸ್ತಾಪ ಮುಂದಿಟ್ಟಿದೆ.
ರಷ್ಯಾದಿಂದ ಖರೀದಿಸಲಾದ ಎಸ್-೪೦೦ ವ್ಯವಸ್ಥೆಗಳು ಭಾರತೀಯ ಸೇನೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದು, ಇತ್ತೀಚಿನ ಸಂಘರ್ಷದಲ್ಲಿ ಪಾಕಿಸ್ತಾನವು ಉಡಾಯಿಸಿದ ಕ್ಷಿಪಣಿಗಳು ಮತ್ತು ಡ್ರೋನ್‌ಗಳನ್ನು ತಡೆಹಿಡಿಯುವಲ್ಲಿ ಮತ್ತು ಹೊಡೆದುರುಳಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿವೆ.
ಕಾರ್ಯಾಚರಣೆಯ ಬಗ್ಗೆ ತಿಳಿದಿರುವ ಅಧಿಕಾರಿಗಳ ಪ್ರಕಾರ, ಈ ವ್ಯವಸ್ಥೆಗಳು ಪಶ್ಚಿಮ ಗಡಿಯಿಂದ ಬಂದ ವೈಮಾನಿಕ ಬೆದರಿಕೆಗಳನ್ನು ಎದುರಿಸುವಲ್ಲಿ ಹೆಚ್ಚಿನ ನಿಖರತೆ ಮತ್ತು ಪರಿಣಾಮಕಾರಿತ್ವವನ್ನು ತೋರಿಸಿವೆ.
ವಾಯು ರಕ್ಷಣಾ ಸಾಮರ್ಥ್ಯ ವೃದ್ಧಿ
ಈ ಕಾರ್ಯಕ್ಷಮತೆಯಿಂದ ಪ್ರೇರಿತವಾದ ಭಾರತವು, ಮಾಸ್ಕೋದಿಂದ ಹೆಚ್ಚಿನ ಸರಬರಾಜುಗಳನ್ನು ಕೋರಿ, ತನ್ನ ವಾಯು ರಕ್ಷಣಾ ಸಾಮರ್ಥ್ಯವನ್ನು ವಿಸ್ತರಿಸಲು ಮುಂದಾಗಿದೆ. ರಷ್ಯಾವು ಈ ಮನವಿಯನ್ನು ಶೀಘ್ರವೇ ಅನುಮೋದಿಸುವ ಸಾಧ್ಯತೆಯಿದೆ ಎಂದು ಮೂಲಗಳು ತಿಳಿಸಿವೆ.
ಎಸ್-400 ವ್ಯವಸ್ಥೆಯ ವೈಶಿಷ್ಟ್ಯ
ರಷ್ಯಾದಿಂದ ಖರೀದಿಸಲಾದ ಎಸ್-400 ವಾಯು ರಕ್ಷಣಾ ವ್ಯವಸ್ಥೆಗಳನ್ನು ಭಾರತದಲ್ಲಿ ‘ಸುದರ್ಶನ ಚಕ್ರ’ ಎಂದು ಕರೆಯಲಾಗುತ್ತದೆ.
ಇವು ವಿಶ್ವದ ಅತ್ಯಾಧುನಿಕ ವಾಯು ರಕ್ಷಣಾ ವ್ಯವಸ್ಥೆಗಳಲ್ಲಿ ಒಂದಾಗಿದ್ದು, 600 ಕಿ.ಮೀ. ದೂರದವರೆಗಿನ ಗುರಿಗಳನ್ನು ಪತ್ತೆಹಚ್ಚುವ ಮತ್ತು 400 ಕಿ.ಮೀ. ವ್ಯಾಪ್ತಿಯಲ್ಲಿ ತಡೆಯುವ ಸಾಮರ್ಥ್ಯವನ್ನು ಹೊಂದಿವೆ. ಅಲ್ಲದೇ ಒಂದೇ ಬಾರಿ ಭಿನ್ನ 4 ಕ್ಷಿಪಣಿಗಳನ್ನು ಉಡಾಯಿಸುವ ಸಾಮರ್ಥ್ಯ ಹೊಂದಿದೆ.
ಭಾರತವು 2018ರಲ್ಲಿ ರಷ್ಯಾದೊಂದಿಗೆ 5.43 ಶತಕೋಟಿ ಡಾಲರ್ ಮೌಲ್ಯದ ಐದು ಎಸ್-400 ವ್ಯವಸ್ಥೆಗಳ ಒಪ್ಪಂದಕ್ಕೆ ಸಹಿ ಹಾಕಿತು. 2021ರಲ್ಲಿ ಪಂಜಾಬ್‌ನಲ್ಲಿ ಮೊದಲ ಘಟಕವನ್ನು ನಿಯೋಜಿಸಲಾಯಿತು, ಇದು ಪಾಕಿಸ್ತಾನ ಮತ್ತು ಚೀನಾದಿಂದ ಬರುವ ವೈಮಾನಿಕ ಬೆದರಿಕೆಗಳನ್ನು ಎದುರಿಸುವ ಗುರಿಯನ್ನು ಹೊಂದಿತ್ತು.
ನಾಲ್ಕು ರೀತಿಯ ಕ್ಷಿಪಣಿಗಳನ್ನು ಉಡಾಯಿಸುವ ಸಾಮರ್ಥ್ಯವಿರುವ ಎಸ್-400, ವಿಮಾನಗಳು, ಡ್ರೋನ್‌ಗಳು, ಕ್ರೂಸ್ ಕ್ಷಿಪಣಿಗಳು ಮತ್ತು ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ತಡೆಯಬಲ್ಲದು. ಇದರ ಸುಧಾರಿತ ಫೇಸ್ಡ್-ಅರೇ ರಾಡಾರ್ ಆದ ಎಸ್500 ಏಕಕಾಲದಲ್ಲಿ 100ಕ್ಕೂ ಹೆಚ್ಚು ಗುರಿಗಳನ್ನು ಪತ್ತೆಹಚ್ಚುತ್ತದೆ.
ಇದರ ಮೊಬೈಲ್ ಲಾಂಚರ್ ಯುದ್ಧಭೂಮಿಯಲ್ಲಿ ತ್ವರಿತ ಮರುನಿಯೋಜನೆಗೆ ಅನುವು ಮಾಡಿಕೊಡುತ್ತದೆ.
ಇತ್ತೀಚಿನ ಸಂಘರ್ಷದ ಸಂದರ್ಭದಲ್ಲಿ, ಎಸ್-400 ವ್ಯವಸ್ಥೆಗಳು ಪಾಕಿಸ್ತಾನದ ಜೆಟ್‌ಗಳು ಮತ್ತು ಕ್ಷಿಪಣಿಗಳು ತಮ್ಮ ಕಾರ್ಯಾಚರಣೆಗಳನ್ನು ರದ್ದುಗೊಳಿಸಲು ಅಥವಾ ಮಾರ್ಗ ಬದಲಾಯಿಸಲು ಒತ್ತಾಯಿಸಿದವು. ಇದು ಪಾಕಿಸ್ತಾನದ ದಾಳಿಯ ಯೋಜನೆಗಳಿಗೆ ನಿರ್ಣಾಯಕ ಹೊಡೆತವನ್ನು ನೀಡಿತು.
