ಮಡಿಕೇರಿ: ವನ್ಯಜೀವಿಗಳನ್ನು ಬೇಟೆಯಾಡುವ ಉದ್ದೇಶದಿಂದ ತಲಕಾವೇರಿ ವನ್ಯಜೀವಿ ಅಭಯಾರಣ್ಯಕ್ಕೆ ಬಂದಿದ್ದ ಒಂಬತ್ತು ಮಂದಿಯ ಪೈಕಿ ಎಂಟು ಮಂದಿಯನ್ನು ಅರಣ್ಯ ಇಲಾಖೆ ಸಿಬ್ಬಂದಿಗಳು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಸಿ.ಆರ್.ಕಿಶೋರ್, ಎಚ್.ಸಿ.ರೋಷನ್, ಪಿ.ಜಿ.ಸತೀಶ್, ಕೆ.ಎಂ.ರಾಜೇಶ್, ಎಸ್.ಪಿ.ಹರೀಶ್ ಕುಮಾರ್, ಪಿ.ಜಿ.ಹರೀಶ್, ಬಿ.ಬಿ.ಶ್ರೀಕಾಂತ್ ಹಾಗೂ ಕೆ.ಆರ್.ಕರುಣೇಶ್ ಬಂಧಿತ ಆರೋಪಿಗಳು. ಎಚ್.ಪಿ.ವಸಂತ ಕುಮಾರ್ ಆರೋಪಿ ಪರಾರಿಯಾಗಿದ್ದಾನೆ.
ಅ.28ರ ಮುಂಜಾನೆ ಚೇರಂಡೇಟಿ, ಸಿಂಗತ್ತೂರು, ಕೊಟ್ಟೂರು ಹಾಗೂ ತಣ್ಣಿಮಾನಿ ಗ್ರಾಮಗಳ ಒಂಬತ್ತು ಮಂದಿ ಬೇಟೆಗಾರರು ಒಂದು ಸಿಂಗಲ್ ಬ್ಯಾರೆಲ್ 12 ಗೇಜ್ ಬಂದೂಕಿನೊಂದಿಗೆ ಎರಡು ಮಾರುತಿ ಓಮ್ನಿ ಹಾಗೂ ಒಂದು ಮಾರುತಿ 800ಕಾರಿನಲ್ಲಿ ಅಭಯಾರಣ್ಯ ಪ್ರವೇಶಿಸಿದ್ದರು.
ಅಕ್ಕಿಕಂಡಿ ಎಪಿಸಿ ಬಳಿ ಅರಣ್ಯ ಸಿಬ್ಬಂದಿಯನ್ನು ಕಂಡ ಆರೋಪಿಗಳು ಪರಾರಿಯಾಗಲು ಯತ್ನಿಸಿದ್ದಾರೆ. ಈ ವೇಳೆ ಕಾರ್ಯಾಚರಣೆ ನಡೆಸಿದ ವಲಯ ಅರಣ್ಯಾಧಿಕಾರಿ ಹಾಗೂ ಸಿಬ್ಬಂದಿ ಅಕ್ಕಿಕಂಡಿ ಎಪಿಸಿ, ತಾವೂರು ರಸ್ತೆ ಮತ್ತು ಭಾಗಮಂಡಲದ ಬಳಿ ಮೂರು ವಾಹನಗಳಲ್ಲಿದ್ದ ಎಂಟು ಮಂದಿಯನ್ನು ವಶಕ್ಕೆ ಪಡೆದಿದ್ದಾರೆ. ಎಚ್.ಪಿ.ವಸಂತ ಕುಮಾರ್ ಎಂಬಾತ ಪರಾರಿಯಾಗಿದ್ದಾನೆ.
ಬಂಧಿತರಿಂದ ಮೂರು ವಾಹನಗಳು, ಒಂದು ಸಿಂಗಲ್ ಬ್ಯಾರೆಲ್ ಬಂದೂಕು, ಮೂರು ಕಾಡತೂಸುಗಳು, ಹೆಡ್‌ಲೈಟ್ ಟಾರ್ಚ್‌ಗಳು ಹಾಗೂ ಮೊಬೈಲ್ ಫೋನ್‌ಗಳನ್ನು ಜಪ್ತಿ ಮಾಡಲಾಗಿದೆ. ಬಂಧಿತ ಆರೋಪಿಗಳನ್ನು ಬುಧವಾರ ಸಂಜೆ ಮಡಿಕೇರಿಯ ಜೆಎಂಎಫ್‌ಸಿ ನ್ಯಾಯಾಲಯಕ್ಕೆ ಹಾಜರುಪಡಿಸುವುದಾಗಿ ಅರಣ್ಯ ಇಲಾಖೆ ತಿಳಿಸಿದೆ.
ತಲಕಾವೇರಿ ವನ್ಯಜೀವಿ ಅಭಯಾರಣ್ಯದ ವಲಯ ಅರಣ್ಯಾಧಿಕಾರಿ ಹೆಚ್.ಎಸ್.ತ್ಯಾಗರಾಜ್ ಕಾರ್ಯಾಚರಣೆಯ ನೇತೃತ್ವ ವಹಿಸಿದ್ದರು. ಉಪ ವಲಯ ಅರಣ್ಯಾಧಿಕಾರಿ ಎನ್.ಎನ್.ಅಕ್ಕಮ್ಮ ಹಾಗೂ ಅರಣ್ಯ ವೀಕ್ಷಕರಾದ ಧನಂಜಯ್, ಕಿರಣ್, ವಿವೇಕ್, ಲಕ್ಷ್ಮಣ್, ರಾಜೇಶ್, ಜೀವನ್ ಮತ್ತು ರಾಘವೇಂದ್ರ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.
