ಸೋತೆ ಬಿಟ್ಟೆವು ಎಂದು ಭಾವಿಸಿದ್ದ ಪಂದ್ಯವನ್ನು ಕೊನೆಯ ಎಸೆತದವರೆಗೂ ತೆಗೆದುಕೊಂಡು ಹೋದ ಭಾರತ ಕಿರಿಯರ ತಂಡ ಪಾಕಿಸ್ತಾನ ವಿರುದ್ಧ ರೋಚಕ 1 ವಿಕೆಟ್ ಜಯಭೇರಿ ಬಾರಿಸಿ 19 ವರ್ಷದೊಳಗಿನವರ ಏಷ್ಯಾಕಪ್ ಚಾಂಪಿಯನ್ ಆಗಿ ಹೊರಹೊಮ್ಮಿದೆ.
ಎಐ ಅಮರತ್ ಮೈದಾನದಲ್ಲಿ ಶನಿವಾರ ನಡೆದ ಫೈನಲ್ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಪಾಕಿಸ್ತಾನ ತಂಡ ಆರಂಭಿಕ ಉಸ್ಮಾನ್ ಖಾನ್ ಅವರ ಶತಕದ ನೆರವಿನಿಂದ 50 ಓವರ್ ಗಳಲ್ಲಿ 9 ವಿಕೆಟ್ ಗೆ 337 ರನ್ ಸಂಪಾದಿಸಿತು. ಕಠಿಣ ಗುರಿ ಬೆಂಬತ್ತಿದ ಭಾರತ ತಂಡ 50 ಓವರ್ ಗಳಲ್ಲಿ 9 ವಿಕೆಟ್ ಕಳೆದುಕೊಂಡು ಜಯಭೇರಿ ಬಾರಿಸಿತು. ಈ ಮೂಲಕ ಲೀಗ್ ಹಂತದಲ್ಲಿ ಪಾಕಿಸ್ತಾನ ವಿರುದ್ಧ ಅನುಭವಿಸಿದ ಸೋಲಿಗೆ ಭರ್ಜರಿಯಾಗಿ ಸೇಡು ತೀರಿಸಿಕೊಂಡಿತು.
ಒಂದು ಹಂತದಲ್ಲಿ ಭಾರತ ತಂಡ 47.2 ಓವರ್ ಗಳಲ್ಲಿ 309 ರನ್ ಗೆ 9 ವಿಕೆಟ್ ಕಳೆದುಕೊಂಡು ಸೋಲಿನ ದವಡೆಗೆ ಸಿಲುಕಿತ್ತು. ಆದರೆ ಮೋಹಿತ್ ಉಲ್ಮಾ ಏಕಾಂಗಿಯಾಗಿ ಸಿಡಿಲಬ್ಬದ ಬ್ಯಾಟಿಂಗ್ ಪ್ರದರ್ಶಿಸಿ ರೋಚಕ ಗೆಲುವು ತಂದುಕೊಟ್ಟರು.
ಅದರಲ್ಲೂ ಅಂತಿಮ ಎಸೆತದಲ್ಲಿ ಭಾರತ 3 ರನ್ ಗಳಿಸಬೇಕಾದ ಒತ್ತಡಕ್ಕೆ ಸಿಲುಕಿತ್ತು. ಆದರೆ ಮೋಹಿತ್ ಬೌಂಡರಿ ಬಾರಿಸಿ ಗೆಲುವಿನ ರೂವಾರಿ ಆದರು. ಅಂತಿಮವಾಗಿ ಮೋಹಿತ್ ಉಲ್ಮಾ 26 ಎಸೆತಗಳಲ್ಲಿ 5 ಬೌಂಡರಿ ಮತ್ತು 3 ಸಿಕ್ಸರ್ ಒಳಗೊಂಡ 49 ರನ್ ಬಾರಿಸಿ ಅಜೇಯರಾಗಿ ಉಳಿದರು.
ಇದಕ್ಕೂ ಮುನ್ನ ನಾಯಕ ಲಕ್ಷ್ಯ ರೈಚಂದಾನಿ ಮತ್ತು ಆರ್ಯವೀರ್ ಸೆಹ್ವಾಗ್ ಮೊದಲ ವಿಕೆಟ್ ಗೆ 146 ರನ್ ಜೊತೆಯಾಟದಿಂದ ಭರ್ಜರಿ ಆರಂಭ ನೀಡಿದರು. ಲಕ್ಷ್ಯ 80 ರನ್ ಬಾರಿಸಿ ಔಟಾದರೆ, ಆರ್ಯವೀರ್ 58 ರನ್ ಗಳಿಸಿದರು.
ಪಾಕಿಸ್ತಾನ ತಂಡಕ್ಕೆ ಆರಂಭಿಕ ಉಸ್ಮಾನ್ ಖಾನ್ ಶತಕದ ಮೂಲಕ ಬಲ ನೀಡಿದರು. ಉಸ್ಮಾನ್ ಖಾನ್ 111 ಎಸೆತಗಳಲ್ಲಿ 11 ಬೌಂಡರಿ ಮತ್ತು 1 ಸಿಕ್ಸರ್ ಸಹಾಯದಿಂದ 107 ರನ್ ಸಿಡಿಸಿದರೆ, ಅಬ್ದುಲ್ ಖಾದಿರ್ 80 ಹಾಗೂ ನಾಯಕ ಫಾರ್ಹನ್ ಯೂಸುಫ್ 63 ರನ್ ಸಿಡಿಸಿ ತಂಡ ಬೃಹತ್ ಮೊತ್ತ ಕಲೆ ಹಾಕಲು ನೆರವಾದರು.
