ಗೇನ್ ಬಿಟ್‌ ಕಾಯಿನ್ ಕ್ರಿಪ್ಟೋಕರೆನ್ಸಿ ಹಗರಣದ ತನಿಖೆಯ ಭಾಗವಾಗಿ ದೆಹಲಿ, ಪುಣೆ, ಚಂಡೀಗಢ, ನಾಂದೇಡ್, ಕೊಲ್ಹಾಪುರ, ಬೆಂಗಳೂರು ಸೇರಿದಂತೆ 60ಕ್ಕೂ ಅಧಿಕ ಸ್ಥಳಗಳಲ್ಲಿ ಸಿಬಿಐ ಶೋಧ ನಡೆಸಿದೆ.
ಪ್ರಮುಖ ಆರೋಪಿಗಳು, ಅವರ ಸಹಚರರು ಮತ್ತು ಆದಾಯವನ್ನು ಅಕ್ರಮವಾಗಿ ವರ್ಗಾಯಿಸಿಕೊಂಡಿರುವ ಶಂಕಿತ ಸಂಸ್ಥೆಗಳಿಗೆ ಸಂಬಂಧಿಸಿದ ಸ್ಥಳಗಳಲ್ಲಿ ಶೋಧ ನಡೆಸಲಾಗಿದೆ ಎಂದು ಸಿಬಿಐನ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಅಮಿತ್ ಭಾರದ್ವಾಜ್ (ಮೃತ), ಅಜಯ್ ಭಾರದ್ವಾಜ್ ಮತ್ತಿತರರು 2015ರಲ್ಲಿ ಗೇನ್ ಬಿಟ್ಕಾಯಿನ್ ಪ್ರಾರಂಭಿಸಿದ್ದರು. ವೇರಿಯಬಲ್ ಟೆಕ್ ಪ್ರೈವೇಟ್ ಲಿಮಿಟೆಡ್ ಎಂಬ ಕಂಪನಿಯ ಹೆಸರಿನಲ್ಲಿ ವಿವಿಧ ವೆಬ್‌ಸೈಟ್‌ಗಳ ಮೂಲಕ ಕಾರ್ಯಾರಂಭಿಸಿದ್ದ ಗೇನ್ ಕಂಪನಿ, 18 ತಿಂಗಳವರೆಗೆ ಮಾಸಿಕ ಶೇ.10 ಲಾಭದ ಭರವಸೆ ನೀಡುವ ಮೂಲಕ ಹೂಡಿಕೆದಾರರನ್ನು ಆಕರ್ಷಿಸಿತ್ತು ಎಂಬ ಆರೋಪ ಕೇಳಿಬಂದಿತ್ತು. ಮತ್ತು ಬಿಟ್ಕಾಯಿನ್ ಖರೀದಿಸಲು ಮತ್ತು “ಕ್ಲೌಡ್ ಮೈನಿಂಗ್” ಒಪ್ಪಂದಗಳ ಮೂಲಕ ಗೇನ್ ಬಿಟ್ಕಾಯಿನ್ನೊಂದಿಗೆ ಹೂಡಿಕೆ ಮಾಡಲು ಹೂಡಿಕೆದಾರರನ್ನು ಪ್ರೋತ್ಸಾಹಿಸಿತ್ತು.
ಆರಂಭದಲ್ಲಿ ಹೂಡಿಕೆದಾರರಿಗೆ ಲಾಭ ನೀಡಿದ್ದ ಗೇನ್ ಬಿಟ್ಕಾಯಿನ್ ಕಂಪನಿಗೆ, 2017ರ ವೇಳೆಗೆ ಹೊಸ ಹೂಡಿಕೆಗಳು ಕಡಿಮೆ ಆಗಲಾರಂಭಿಸಿದ್ದವು. ಕುಸಿತದ ಹಂತ ತಲುಪಿದ್ದ ಕಂಪನಿ, ನಷ್ಟವನ್ನು ಮುಚ್ಚಿಹಾಕುವ ಪ್ರಯತ್ನದಲ್ಲಿ ಏಕಪಕ್ಷೀಯವಾಗಿ ಪಾವತಿಗಳನ್ನು ಕಡಿಮೆ ಮೌಲ್ಯದ ತನ್ನ ಆಂತರಿಕ ಕ್ರಿಪ್ಟೋಕರೆನ್ಸಿಯಾದ ಬದಲಾಯಿಸಿತ್ತು. ಮತ್ತು ಇದು ಹೂಡಿಕೆದಾರರ ಗೊಂದಲಕ್ಕೆ ಕಾರಣವಾಗಿತ್ತು.
ಬಳಿಕ ಭಾರಿ ಪ್ರಮಾಣದ ವಂಚನೆ ಮತ್ತು ಹಣ ವರ್ಗಾವಣೆ ಆರೋಪದಡಿ ಗೇನ್ ಬಿಟ್ಕಾಯಿನ್ ಕಂಪನಿಯ ವಿರುದ್ಧ ದೇಶದ ವಿವಿಧೆಡೆ ಎಫ್‌ಐಆರ್‌ಗಳು ದಾಖಲಾಗಿದ್ದವು.
ಹಗರಣದ ವ್ಯಾಪಕ ಪ್ರಮಾಣವನ್ನು ಗಮನದಲ್ಲಿಟ್ಟುಕೊಂಡು ಸುಪ್ರೀಂ ಕೋರ್ಟ್ ಈ ಪ್ರಕರಣವನ್ನು ಸಿಬಿಐಗೆ ವರ್ಗಾಯಿಸಿತ್ತು. ಇದುವರೆಗೂ ಗೇನ್ ಬಿಟ್ಕಾಯಿನ್ ಕಂಪನಿಗೆ ಸೇರಿದ ಕ್ರಿಪ್ಟೋ ವ್ಯಾಲೆಟ್‌ಗಳು, ಡಿಜಿಟಲ್ ಸಾಕ್ಷ್ಯಗಳು, ಡಿಜಿಟಲ್ ಸಾಧನಗಳು, ಇಮೇಲ್ಗಳು/ಕ್ಲೌಡ್ ಸ್ಟೋರೇಜ್ಗಳನ್ನು ವಶಪಡಿಸಿಕೊಂಡಿದ್ದು, ತನಿಖೆ ಮುಂದುವರೆಸಲಾಗಿದೆ ಎಂದು ಸಿಬಿಐ ತಿಳಿಸಿದೆ.
