ಹೃದಯ ಸಂಬಂಧಿ ಕಾಯಿಲೆಯಿಂದ ಬಳಲುತ್ತಿದ್ದ 4 ಬಾರಿಯ ಗ್ರ್ಯಾಮಿ ಪ್ರಶಸ್ತಿ ವಿಜೇತ ಖ್ಯಾತ ಮಾಂತ್ರಿಕ ತಬಲಾ ವಾದಕ ಜಾಕಿರ್ ಹುಸೇನ್ ಇಹಲೋಕ ತ್ಯಜಿಸಿದ್ದಾರೆ. ಅವರಿಗೆ 73 ವರ್ಷ ವಯಸ್ಸಾಗಿತ್ತು.
ಅನಾರೋಗ್ಯದ ಕಾರಣ ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೊದಲ್ಲಿ ಆಸ್ಪತ್ರೆಗೆ ದಾಖಲಿಸಿದ್ದರು. ಆದರೆ ಚಿಕಿತ್ಸೆ ಫಲಕಾರಿಯಾಗದೇ ಭಾನುವಾರ ಸಂಜೆ ವಿಧಿವಶರಾಗಿದ್ದಾರೆ.
ಜಗತ್ತಿನ ಅತ್ಯಂತ ವೇಗದ ತಬಲಾ ವಾದಕರಾಗಿದ್ದ ಜಾಕಿರ್ ಹುಸೇನ್ ಅಸಾಮಾನ್ಯ ಕಲಾವಿದರಾಗಿ ಜಗದ್ವಿಖ್ಯಾತರಾಗಿದ್ದರು. ಜಗತ್ತಿನ ಅತ್ಯಂತ ವೇಗದ ಪಕ್ಷಿಯಾದ ಹಮ್ಮಿಂಗ್ ಬರ್ಡ್ ಗಿಂತ ವೇಗವಾಗಿ ಜಾಕಿರ್ ಹುಸೇನ್ ಬೆರಳುಗಳು ತಬಲಾ ಮೇಲೆ ಹರಿದಾಡುತ್ತವೆ ಎಂಬ ಪ್ರತೀತಿ ಇತ್ತು.
ಖ್ಯಾತ ತಬಲಾ ವಾದಕ ಅಲ್ಲಾಹ್ ರಖಾ ಅವರ ಕೊನೆಯ ಪುತ್ರರಾಗಿ ಮುಂಬೈನಲ್ಲಿ ಜನಿಸಿದ್ದ ಜಾಕಿರ್ ಹುಸೇನ್, 13ನೇ ವಯಸ್ಸಿನಲ್ಲಿ ತಂದೆ ನಿಶ್ಚಿತಾರ್ಥ, ಮದುವೆ ಕಾರ್ಯಕ್ರಮಗಳಲ್ಲಿ ತಬಲಾ ನುಡಿಸಲ್ಲ. ಅವರ ಮಗ ನುಡಿಸುತ್ತಾನೆ ಎಂದು ಹೇಳಿಕೊಂಡು ಕಾರ್ಯಕ್ರಮ ನಡೆಸಿಕೊಟ್ಟಿದ್ದರು. ಈ ಮೂಲಕ ಮೊದಲ ಬಾರಿ ಸಾರ್ವಜನಿಕ ಕಾರ್ಯಕ್ರಮ ನೀಡಿದ್ದ ಜಾಕಿರ್ ಮತ್ತೆಂದೂ ತಿರುಗಿ ನೋಡಲೇ ಇಲ್ಲ.
ಜಾಕಿರ್ ಹುಸೇನ್ ನಿಧನಕ್ಕೆ ಕಾಂಗ್ರೆಸ್ ಮುಖಂಡ ರಾಹುಲ್ ಗಾಂಧಿ ಹಾಗೂ ಕೇಂದ್ರ ಸಚಿವ ನಿತಿನ್ ಗಡ್ಕರಿ ಸೇರಿದಂತೆ ಹಲವು ಗಣ್ಯರು ಶೋಕ ವ್ಯಕ್ತಪಡಿಸಿದ್ದಾರೆ.
6 ದಶಕಗಳ ಕಾಲ ತಬಲಾ ವಾದಕರಾಗಿ ವೃತ್ತಿಜೀವನ ನಡೆಸಿದ ಜಾಕಿರ್ ಹುಸೇನ್ ರಾಷ್ಟ್ರ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹಲವಾರು ಖ್ಯಾತ ಕಲಾವಿದರೊಂದಿಗೆ ಕೆಲಸ ಮಾಡಿದ್ದಾರೆ. ಅದರಲ್ಲೂ ಇಂಗ್ಲೀಷ್ ಗಿಟಾರ್ ವಾದಕ ಜಾನ್ ಮೆಕ್‌ಲಾಫ್ಲಿನ್, ಪಿಟೀಲು ವಾದಕ ಎಲ್.ಶಂಕರ್ ಮತ್ತು ತಾಳವಾದ್ಯ ವಾದಕ ಟಿಎಚ್ ‘ವಿಕ್ಕು’ ವಿನಾಯಕ್ ಮುಂತಾದವರೊಂದಿಗೆ ಕೈ ಜೋಡಿಸಿದ್ದರು.
ಸಂಗೀತ ಕ್ಷೇತ್ರಕ್ಕೆ ಅಭೂತಪೂರ್ವ ಸೇವೆಗಾಗಿ ಭಾರತದ ಪ್ರತಿಷ್ಠಿತ ಪ್ರಶಸ್ತಿಗಳಾದ 1988ರಲ್ಲಿ ಪದ್ಮಶ್ರೀ, 2002ರಲ್ಲಿ ಪದ್ಮಭೂಷಣ್, 2023ರಲ್ಲಿ ಪದ್ಮವಿಭೂಷಣ್ ಪ್ರಶಸ್ತಿಗೆ ಪಾತ್ರರಾಗಿದ್ದರು.
