ದೆಹಲಿಯ ಕೆಂಪುಕೋಟೆಯ ಬಳಿ ಕಾರು ಸ್ಫೋಟಗೊಳಿಸುವ ಮುನ್ನ ಉಗ್ರರು ಇಸ್ರೇಲ್ ಮೇಲೆ ಹಮಾಸ್ ದಾಳಿ ನಡೆಸಿದ ಮಾದರಿಯಲ್ಲಿ ಡ್ರೋಣ್ ಗಳ ಮೂಲಕ ದಾಳಿಗೆ ಸಂಚು ರೂಪಿಸಿದ್ದರು ಎಂಬ ಸ್ಫೋಟಕ ಅಂಶ ಬೆಳಕಿಗೆ ಬಂದಿದೆ.
ವೈಟ್ ಕಾಲರ್ ಉಗ್ರರ ತಂಡ ಶಸ್ತ್ರಾಸ್ತ್ರ ತುಂಬಿದ ಡ್ರೋಣ್ ಗಳಾಗಿ ಪರಿವರ್ತಿಸಿ ರಾಕೆಟ್ ಗಳನ್ನು ರೂಪಿಸಿ ಅದರ ಪ್ರಯೋಗಗಳನ್ನು ಕೂಡ ನಡೆಸಿದ್ದರು ಎಂದು ಎನ್ ಐಎ ತನಿಖೆ ವೇಳೆ ಬೆಳಕಿಗೆ ಬಂದಿದೆ.
2023ರ ಅಕ್ಟೋಬರ್ ೭ರಂದು ಹಮಾಸ್ ಉಗ್ರರು ಇಸ್ರೇಲ್ ಡ್ರೋಣ್ ಮೂಲಕ ದಾಳಿ ನಡೆಸಿ ಆಘಾತ ನೀಡಿತ್ತು. ಇದೇ ಮಾದರಿಯಲ್ಲಿ ಉಗ್ರರು ದಾಳಿ ನಡೆಸಲು ಭಾರೀ ಸಂಚು ನಡೆಸಿದ್ದರು ಎಂದು ತಿಳಿದು ಬಂದಿದೆ.
ಬಂಧಿತ ಎರಡನೇ ಶಂಕಿತ ಉಗ್ರ ಉಮರ್ ಅನ್ ನಬಿ ಸೂಸೈಡ್ ಬಾಂಬರ್ ಆಗಿ ಕೆಲಸ ಮಾಡಿದ ಅನುಭವ ಹೊಂದಿದ್ದು, ಈತ ಬಾಂಬ್ ಸಿದ್ಧಪಡಿಸುವ ಡ್ರೋಣ್ ಗಳಿಗೆ ಬಾಂಬ್ ಗಳನ್ನು ಅಳವಡಿಸಿದ್ದ.
ಜಮ್ಮು ಕಾಶ್ಮೀರದಲ್ಲಿ ಬಂಧಿತನಾದ ಮೊದಲ ಶಂಕಿತ ಉಗ್ರ ಹಾಗೂ ವೈದ್ಯ ಜಸ್ವೀರ್ ಬಿಲಾಲ್ ವಾನಿ ಅಲಿಯಾಸ್ ಡ್ಯಾನಿಶ್ ಡ್ರೋಣ್ ಗಳು ಹೆಚ್ಚುವರಿ ಸ್ಫೋಟಕಗಳನ್ನು ಹೊರುವ ಸಾಮರ್ಥ್ಯ ಹೊಂದಲು ಹೆಚ್ಚುವರಿ ಬ್ಯಾಟರಿಗಳನ್ನು ಜೋಡಿಸುತ್ತಿದ್ದ. ಈತ ಈ ರೀತಿ ಸಣ್ಣ ರೀತಿಯ ಡ್ರೋಣ್ ಗಳನ್ನು ಸಿದ್ಧಪಡಿಸುತ್ತಿದ್ದ ಎಂದು ಮೂಲಗಳು ತಿಳಿಸಿವೆ.
ಎನ್ ಐಎ ಇದೀಗ ಎಲ್ಲಾ ಅಂಶಗಳನ್ನು ಆಧರಿಸಿ ತನಿಖೆ ನಡೆಸುತ್ತಿದ್ದು, ಮತ್ತಷ್ಟು ಆಳವಾಗಿ ತನಿಖೆಗೆ ಇಳಿಯಲಿದೆ ಎಂದು ತಿಳಿಸಿದೆ.
