ಲಖನೌ: ಅಯೋಧ್ಯೆ ರಾಮ ದೇಗುಲದ ಹೆಸರಿನಲ್ಲಿ ನಡೆಯುತ್ತಿದ್ದ ಅತೀ ದೊಡ್ಡ ಪ್ರಸಾದ ಹಗರಣವನ್ನು ಅಯೋಧ್ಯೆ ಪೊಲೀಸರು ಭೇದಿಸಿದ್ದು, 3.59 ಕೋಟಿ ರೂ.ಗಳ ಆನ್ಲೈನ್ ವಂಚನೆಯನ್ನು ಬಯಲಿಗೆಳೆದಿದ್ದಾರೆ.
ಅಯೋಧ್ಯೆ ಪೊಲೀಸರು ದೇವಾಲಯ ಪಟ್ಟಣದ ಇತಿಹಾಸದಲ್ಲಿಯೇ ಅತಿದೊಡ್ಡ ಸೈಬರ್ ಹಗರಣಗಳಲ್ಲಿ ಒಂದನ್ನು ಭೇದಿಸಿದ್ದು, ಇದರಲ್ಲಿ ರಾಮ ಲಲ್ಲಾ ಪ್ರಸಾದದ ಹೆಸರಿನಲ್ಲಿ 3.85 ಕೋಟಿ ರೂ.ಗಳ ಆನ್ಲೈನ್ ವಂಚನೆ ನಡೆದಿದೆ.
ಈ ಪ್ರಕರಣ ಸಂಬಂಧ ಈಗಾಗಲೇ ಪೊಲೀಸರು ಮಾಸ್ಟರ್ ಮೈಂಡ್ ಆಶಿಶ್ ಸಿಂಗ್ ನನ್ನು ಬಂಧಿಸಿದ್ದಾರೆ ಎನ್ನಲಾಗಿದೆ.
ವಂಚನೆಯ ಕಾರ್ಯವಿಧಾನ
ಮೂಲಗಳ ಪ್ರಕಾರ ಆರೋಪಿ ಆಶಿಶ್ ಸಿಂಗ್, ಸಿಯಾಟಲ್ನ ಈಶಾನ್ಯ ವಿಶ್ವವಿದ್ಯಾಲಯದಲ್ಲಿ ಪ್ರಾಧ್ಯಾಪಕನಾಗಿ ನಟಿಸಿ, ರಾಮ ದೇವಾಲಯದ ಪ್ರಸಾದವನ್ನು ಭಕ್ತರ ಮನೆ ಬಾಗಿಲಿಗೆ ತಲುಪಿಸುವುದಾಗಿ ನಕಲಿ ವೆಬ್ಸೈಟ್ ಮೂಲಕ ಲಕ್ಷಾಂತರ ಭಕ್ತರನ್ನು ವಂಚಿಸಿದ್ದಾನೆ.
ಗಾಜಿಯಾಬಾದ್ನ ಇಂದಿರಾಪುರಂನ ವಿಂಡ್ಸರ್ ಪಾರ್ಕ್ನ ನಿವಾಸಿ ಹಾಗೂ ಪ್ರಸ್ತುತ ಅಮೆರಿಕದಲ್ಲಿ ವಾಸಿಸುತ್ತಿದ್ದ ಆಶಿಶ್ ಸಿಂಗ್ ನೇತೃತ್ವದಲ್ಲಿ ಈ ಹಗರಣ ನಡೆಯುತ್ತಿತ್ತು. 2024 ರ ಪವಿತ್ರೀಕರಣ ಸಮಾರಂಭಕ್ಕೆ ಕೆಲವೇ ವಾರಗಳ ಮೊದಲು ನಕಲಿ ಪೋರ್ಟಲ್ ಅನ್ನು ಪ್ರಾರಂಭಿಸಿದ.
ಡಿಸೆಂಬರ್ 19, 2023 ರಿಂದ ಜನವರಿ 12, 2024 ರವರೆಗೆ ಸುಮಾರು 6.3 ಲಕ್ಷಕ್ಕೂ ಹೆಚ್ಚು ದೇಶೀಯ ಮತ್ತು ಅಂತಾರಾಷ್ಟ್ರೀಯ ಭಕ್ತರಿಂದ ಆರ್ಡರ್ಗಳನ್ನು ಸಂಗ್ರಹಿಸಿದ್ದಾನೆ.
ಆಶಿಶ್ ಸಿಂಗ್ ಪ್ರಸಾದ್, ದೇವಾಲಯದ ಪ್ರತಿಕೃತಿಗಳು ಮತ್ತು ರಾಮ ದೇವಾಲಯದ ಸ್ಮರಣಾರ್ಥ ನಾಣ್ಯಗಳ “ಉಚಿತ ಡೆಲಿವರಿ”ಯನ್ನು ನೀಡುತ್ತಿದ್ದ. ಆದಾಗ್ಯೂ, ಈ ಖತರ್ನಾಕ್ ತಂಡ ಭಾರತೀಯ ಬಳಕೆದಾರರಿಗೆ 51 ರೂ.ಗಳ ಮತ್ತು ವಿದೇಶಿ ಭಕ್ತರಿಗೆ 11 ಯುಎಸ್ ಡಾಲರ್ಗಳನ್ನು “ಸೇವಾ ಶುಲ್ಕ”ವಾಗಿ ವಿಧಿಸುತ್ತಿದ್ದರು ಎಂದು ಹೇಳಲಾಗಿದೆ.
ಆನ್ಲೈನ್ ವಹಿವಾಟು ಮತ್ತು ಬಂಧನ
ತಮ್ಮ ವೆಬ್ಸೈಟ್ ಮೂಲಕ, ಆಶಿಶ್ ಸಿಂಗ್ ಯೆಸ್ ಬ್ಯಾಂಕ್, ಪೇಟಿಎಂ, ಫೋನ್ಪೇ, ಮೊಬಿಕ್ವಿಕ್ ಮತ್ತು ಐಡಿಎಫ್ಸಿಐ ಸೇರಿದಂತೆ ಬಹು ಡಿಜಿಟಲ್ ಗೇಟ್ವೇಗಳ ಮೂಲಕ ಪಾವತಿಗಳನ್ನು ಸಂಗ್ರಹಿಸುತ್ತಿದ್ದ.
ಈ ವರೆಗೂ ಸುಮಾರು 49 ಲಕ್ಷ ರೂ.ಗಳ ವಹಿವಾಟುಗಳನ್ನು ಸಂಗ್ರಹಿಸಿದ್ದ. ಇದಲ್ಲದೆ 3.85 ಕೋಟಿ ರೂ.ಗಳು ಪ್ರಸಾದ ವಿತರಣೆ ಮತ್ತು ಉಳಿದವು ಇತರ ವಸ್ತುಗಳ ಮಾರಾಟದಿಂದ ಬಂದವಾಗಿವೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ಇನ್ನು ಈ ಆಶಿಶ್ ಸಿಂಗ್ ವ್ಯವಹಾರದ ಕುರಿತು ಶ್ರೀ ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್ ಅನುಮಾನಾಸ್ಪದ ಆನ್ಲೈನ್ ಚಟುವಟಿಕೆಯನ್ನು ಗಮನಿಸಿ ಅಯೋಧ್ಯಾ ಸೈಬರ್ ಅಪರಾಧ ಘಟಕಕ್ಕೆ ದೂರು ನೀಡಿದಾಗ ಹಗರಣ ಬೆಳಕಿಗೆ ಬಂದಿದೆ.
ಐಪಿಸಿ ಸೆಕ್ಷನ್ ೪೨೦, ಐಟಿ ಕಾಯ್ದೆ ಸೆಕ್ಷನ್ 66 ಡಿ, ಮತ್ತು 1967 ರ ಪಾಸ್ ಪೋರ್ಟ್ ಕಾಯ್ದೆಯ ಸೆಕ್ಷನ್ 12(3) ರ ಅಡಿಯಲ್ಲಿ ಕ್ರಿಮಿನಲ್ ಪ್ರಕರಣವನ್ನು ತಕ್ಷಣವೇ ದಾಖಲಿಸಲಾಯಿತು.
